今日醃蕎頭

細個阿媽間唔中喺街市會買一包仔蕎頭，飯前食幾粒，或者間唔中買一樽返嚟。。。但冇諗過橋頭係點樣整，亦從未諗過自己會去醃。。。 幾年前喺日本超級市場，俾我發現，大約每年呢一個入夏期間就有未醃過新鮮蕎頭賣，當一見到時非常雀躍！於是買返屋企試吓自己整，研究吓個包裝，原來嚟自鳥取県。 關於鳥取県，對我嚟講，可以話有一個潛意識嘅情意結。一開始認識呢個地方係睇「漂流教室」日劇版本，發現原來日本都有沙漠，覺得好神奇！之後，到秋天，會有水晶梨賣，見到來貨又係鳥取県，所以對呢個地方多咗一點認識。然後發現，原來鳥取県仲出名出產橋頭！好開心！有機會一定會去呢個地方睇下。 今年已經係第三次自己醃蕎頭。跟足包裝指示去做，需要些少步驟，但都好簡單。同埋知道自己嘅原材料係乜嘢，食落更安心。 日本人食咖喱時候會加幾粒蕎頭。入鄉隨俗，我呢幾年都學咗呢個習慣（以前食咖喱係唔會加蕎頭）。最近你又有冇一啲新既飲食習慣呢？